ಚಿಕ್ಕಮಗಳೂರು ಜಿಲ್ಲೆ ಆಲ್ದೂರು ಠಾಣೆ ವ್ಯಾಪ್ತಿಯ ಚಿಕ್ಕಳ್ಳ ಗ್ರಾಮದ ಕಾಫಿ ಬೆಳೆಗಾರ ಸಿ.ಎಲ್. ಪ್ರವೀಣ್ ಅವರ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಹನ್ನೊಂದು ಮಂದಿಯ ಮೇಲೆ ಪ್ರಕರಣ ದಾಖಲಾಗಿದೆ.
ಪ್ರವೀಣ್ ಅವರ ತಂದೆ ನೀಡಿದ ದೂರಿನ ಮೇರೆಗೆ ಹನ್ನೊಂದು ಮಂದಿಯ ಮೇಲೆ ಪ್ರಕರಣ ದಾಖಲಾಗಿದ್ದು, ಓರ್ವ ಮಹಿಳೆಯನ್ನು ಬಂಧಿಸಲಾಗಿದೆ. ಉಳಿದವರು ತಲೆಮರೆಸಿಕೊಂಡಿದ್ದು ಅವರ ಬಂಧನಕ್ಕೆ ಪೊಲೀಸರು ಬಲೆ ಬೀಸಿದ್ದಾರೆ.
ನಿನ್ನೆ ಬೆಳಿಗ್ಗೆ ಚಿಕ್ಕಳ್ಳ ಗ್ರಾಮದಲ್ಲಿ ಮನೆಯ ಸಮೀಪವೇ ಪ್ರವೀಣ್ ಅವರನ್ನು ದುಷ್ಕರ್ಮಿಗಳ ತಂಡವೊಂದು ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿ ಕೊಲೆ ಮಾಡಿದ್ದರು. ಪ್ರವೀಣ್ ಅವರ ತಂದೆ ಲಕ್ಷ್ಮಣಗೌಡ ಅವರ ಎರಡೂ ಕೈಗಳನ್ನು ಕಡಿದು ಗಾಯಗೊಳಿಸಿದ್ದರು. ಪ್ರವೀಣ್ ಅವರ ದೊಡ್ಡಪ್ಪನ ಮಗ ಗಜೇಂದ್ರ ಎನ್ನುವವರ ಮೇಲೂ ಹಲ್ಲೇ ನಡೆಸಿದ್ದರು.
ಈ ಸಂಬಂಧ ಆಲ್ದೂರು ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಆಕರ್ಷ್, ಪ್ರಮೋದ್, ಚಿರಾಗ್, ಸಚಿನ್, ದೀಕ್ಷಿತ್, ಸುಬ್ಬೇಗೌಡ, ರಾಮಚಂದ್ರ, ಹೂವೇಗೌಡ, ರಮೇಶ್, ಕುಸುಮ, ಮೋಹನಾಕ್ಷಿ ಎಂಬುವವರ ಮೇಲೆ ಕೇಸು ದಾಖಲಾಗಿದೆ. ಇವರಲ್ಲಿ ಆಕರ್ಷ್, ಪ್ರಮೋದ್, ಚಿರಾಗ್, ಸಚಿನ್, ದೀಕ್ಷಿತ್ ಪ್ರಮುಖ ಆರೋಪಿಗಳಾಗಿದ್ದು, ಉಳಿದವರು ಕೊಲೆಗೆ ಕುಮ್ಮಕ್ಕು ನೀಡಿದ್ದರು ಎನ್ನಲಾಗಿದೆ. ಮೋಹನಾಕ್ಷಿ ಎನ್ನುವರರನ್ನು ಬಂಧಿಸಲಾಗಿದೆ ಉಳಿದವರ ಬಂಧನಕ್ಕೆ ಪೊಲೀಸ್ ತಂಡಗಳನ್ನು ರಚಿಸಲಾಗಿದೆ ಎಂದು ತಿಳಿದುಬಂದಿದೆ.
ಈ ಪ್ರಕರಣ ಸುತ್ತಮುತ್ತಲ ಪ್ರದೇಶದಲ್ಲಿ ತಲ್ಲಣ ಸೃಷ್ಟಿಸಿದ್ದು, ದಾರಿಯ ವಿಚಾರಕ್ಕಾಗಿ ಕೊಲೆಮಾಡಿರುವ ಕೃತ್ಯವನ್ನು ಸಾರ್ವಜನಿಕರು ಒಕ್ಕೊರಲಿನಿಂದ ಖಂಡಿಸಿದ್ದಾರೆ. ಆರೋಪಿಗಳನ್ನು ಬಂಧಿಸಿ ಕಠಿಣ ಶಿಕ್ಷೆಗೆ ಗುರಿಪಡಿಸಬೇಕೆಂದು ಆಗ್ರಹಿಸಿದ್ದಾರೆ.
ಕೊಲೆಗೀಡಾದ ಪ್ರವೀಣ್ ಮೃತದೇಹವನ್ನು ಚಿಕ್ಕಮಗಳೂರಿನಲ್ಲಿ ಮರಣೋತ್ತರ ಪರೀಕ್ಷೆ ನಡೆಸಿ ನಿನ್ನೆ ತಡರಾತ್ರಿ ಚಿಕ್ಕಳ್ಳದಲ್ಲಿ ಅಂತ್ಯಸಂಸ್ಕಾರ ನಡೆಸಲಾಗಿದೆ. ಅಂತ್ಯಸಂಸ್ಕಾರದ ವೇಳೆ ಸಾವಿರಾರು ಮಂದಿ ನೆರೆದು ಕಂಬನಿ ಮಿಡಿದಿದ್ದಾರೆ. ಪ್ರವೀಣ್ ಪತ್ನಿ, ತಂದೆ, ತಾಯಿ, ಸಹೋದರ, ಸಹೋದರಿ ಹಾಗೂ ಕುಟುಂಬದವರನ್ನು ಅಗಲಿದ್ದು ಅವರ ಸಾವಿನಿಂದ ಕುಟುಂಬದವರು ಮತ್ತು ಬಂಧುಗಳು ಆಘಾತಕ್ಕೊಳಗಾಗಿದ್ದಾರೆ.